العمر ماشي بيا و عيلتي هي أكبر عائق قدامي و قدام أحلامي. العمر ماشي بيا و مازلت لا تعلمت العزف على الكمنجة، مازلت متعلمتش التصوير، مازلت مسافرتش لبرا، مازلت منجمش نمارس الصحافة على قاعدة و مازلت و مازلت و مازلت... تحب تكتب مقالات؟ هاني الأنترنت خوذ منها. علاه؟ فش قام تخرج وتشوف وتسال وتصور؟ مربين عزري احنا؟ خلي ناس تقول إلي إنت مش متربية، إلي إنت عيرود مسيب تعمل إلي تحب عليه ومايهمها حد. خالي تولي منعوتة بصبع وتبورلي وما يرضى بيك حد. علاه يامي؟ اش ريتني عملت؟ راني نحب نحضر حدث منظمتو جمعية وكهو. نحب نمشي نحوس مع صحابي أكهو. نحب نحضر إجتماع متع حزب نحب نشوفهم فش يحكيو. نحب ندبر خرجة لبرا. اه! ياسر تحلم إنت! شد بلاصتك وريض. كان مشيت غسلت لماعون خيرلك. كان مشيت سيقت الدار خيرلك. كان مشيت مسحت الغبرة خيرلك. باهي ماناش بش نمشو نصيف سنا؟ وين عندنا نصيفو؟ منعرش. وين يجي. لا لا. منخليش داري انا. يا ما نحب نتفرهد طرف قبل منرجع نقرا. هنو الأردنتور تفرهد بيه. نحط الاردنتور قدامي. نهار و طولو قدام الأردنتور؟؟!! قوم امسح و تعلم الطاطيب أنا في عمرك معرسا وجايبة زوز صغار. لميت طرف فلوس؟ هات نخبيهملك تتخطبش على غفلة. لا يامي! انا نتعب ونلم بش نشري مصورة، بش نشري كمنجة، بش ندخل نتعلم العزف مش بش نلم فلوس ونعرس! سكر فمك تو نشكي بيك لبوك! إنت ماعليك كان تقرا وتخدم وتاخو راجل. باهي ياما. هاني نقرا و تو نخدم و الرجل مهوش هارب. يرحم ربي. شنية؟ يرحم ربي؟ يامي راني نحب نعمل و نعمل و نعمل. بنتي، أعمل إلي تحب مع راجلك... كان خالاك. هههه. كان خلاني. لا نعرف ماهوش بش يخليني. على خاطر بش تختاروهولي كيفكم. فارغ و ميامنش بية و بأحلامي و بطموحي. العمر يجري بيا و أنا من حبس لحبس. من حبس دارنا لحبس الراجل لحبس الصغار. العمر واحد و مانيش حاسة روحي قاعدة نعيش فيه. العمر واحد و قاعد يجري بيا. فر فر. البارح بركة كنت 15. توا 23. 1999. 2007. 2012. 2019. 2030.... العمر هارب وخويا يعمل إلي يحب عليه و أنا ماعملت شي ميلي نحب عليه. يعمل إلي يحب على خاطر تولد ذكر و أنا أنثى. يعمل إلي يحب عليه على خاطر يشفو فينا مش كيفكيف. زوز صغارهم أما أها. ماناش كيفكيف. على خاطر يشوفني عورة و مفيبالهمش انهم في الحقيقة جابو ثورة.
No comments:
Post a Comment