عزيزي شيخ الحمام،
أنا انسانة جبانة. إيه نعم! أنا جبانة!
أول نهار تعديت فيه بحذاك ماكنتش نعرفك. حكالي عليك واحد. ومن هكل نهار وليت مهتمة بيك وبالهالة إلي تحيط بيك وبالطاقة الغريبة إلي خارجة منك.
نتعدى بحذاك كل يوم دراسي ومنقدرش نحط عيني في عينك.
نتعدى بحذاك بش نتطمن عليك. ولعل وعسى نتشجع ونسلم عليك.
كنت كل نهار نبدا ماشية نقرا نبدا تاعبة ودايخة وأعصابي متشنجة وخايفة من التحرش إلي نجم نتعرضلو في مترو2، ديزني وندزك مسني ونمسك.
كنت نستمد طاقتي منك باش نجم نكمل نهاري.
وساعات نبدا قاعدة في المترو كيف يبدا فارغ ونبدى نتخيل سيناريوات "لو كان تشجعت وكلمتك" نوليو أصحاب وتأثر فيا بكلامك ويجي نهار ونكتب كتاب شخصيتو الرئيسية فيها جزء كبير من كيانك.
لكن مت وماوليناش أصحاب ومنعرف عليك كان إلي يعرفوه عليك الناس وبقيت أنا جبانة.
إلى اللقاء في عالم آخر. هذا إن وجد.
No comments:
Post a Comment