برنامج "سو يو ثينك يو كان دانس"/ نص مكتوب باللهجة التونسية

برنامج "سو يو ثينك يو كان دانس" من البرامج المفضلة عندي ملي كنت نقرا في المعهد الثانوي. كنت كيف نتفرج فيهم يشطحو نحس الروح متاعي خرجت من بدني ولبست الشخص إلي قاعد يشطح. مبعد كيف تطورنا ولا عنا انترنات وليت نسجل أسامي الأغاني و كيف تكمل الحلقة متع البرنامج نلوج على الأغاني و نغمض عينية و نعاود نستحضر المشهد الفني بطريقتي الخاصة و مبعد نسمع تهليلات نايجل و نشوف دموع ميا مايكلز و ماري مورفي تدعوني إلى ركوب قطار الهوت تامالي. اتعاطى قنب الغناء و ميثامفيتامين الرقص. لكن كيف كبيرة انتبهت إلى الكثير من التسنفير. سنفرة من التسنفيرات إلي شاهدتها و قاعدة تتكرر تقريباً في جميع البرامج الأمريكية هي الآتية:

الراقص: (بعد القيام برقصة نص قصبة) نحب نفسرلكم الرقصة إلي قمت بيها. صديقي مات في أحداث 11 سبتمبر و أنا كنت نمثل الروح متاعو إلي قاعدة تحاول تخرج من تحت المباني المتهدمة. 

نايجل: يبكي

ماري: تبكي

ليلي درشكون: يبكي

الجمهور: يبكي

التقنين و طاقم العمل: يبكي

(أنا: نبكي (حسرةً على إلي يموتوا كل يوم و ملقاوش شكون يبكي عليهم 

نايجل: 

get over here, son! you're going to Chicago! 

13 سنة مرت و مازالوا يمغضو في هكل لوبانا إلي وكلوها لرواحهم و سنفروها للعراق أما كيف تجبدلهم على الإبادات الجماعية إلي قاموا بها ضد سكان أمريكا الأصليين و إلا تحب تتناقش معاهم على إلي صار في الأمريكين من الأصل الإفريقي لكلها تبلع و تقولك هذاك تاريخ وفا و لتس موف أون. الهنود و الأمريكان من الأصل الإفريقي و مسلمي ميانمار في البورما و التوتسي و الهوتو و البوسنيين المسلمين و الفلسطينيين و و و.. تمت و مازال يتم إغتصاب انسانيتهم إلى هذا اليوم و لا عمري ريت واحد فيهم طلع في التلفاز و إستعمل حجة موت أهله أو عرقه ليربح تعاطف و شفقة الآخرين. 

يحصل في هذه اللحظة في مركز التجارة العالمي (twin towers):

عاطل عن العمل: نحب نخدم

المسؤل عن مكتب الموارد البشرية: اعطني السيرة الذاتية

عاطل عن العمل: مجبتش. أما عندي ولد جد عم بو خالة ولد عم أم بابا مات لهنا في أحداث 11 سبتمبر و جاتني روحو في المنام و.... 

المسؤل عن مكتب الموارد البشرية: 

get over here, son! you've got a job!

#معيز_عالم_المازر_فاكرز_مايد_إن_يو.أس.إي

#اعطوني_كائناتاً_فضائية_و_سأعطيكم_Nephilims

يوميات طالبة العلم متع الله (2) - نص مكتوب باللهجة التونسية

إلي ننوي نعملو: باهي. نروح 5. نرقد نص ساعة. نقوم نشرب قهوة ونصحصح ونحط نقرا حتى ماضي تلاثة متع الليل. نورمال. 

إلي يصير: نروح 5. نقوم بعد ساعتين. نشرب قهوة. نبقى نلعب مع صغار أختي. نضرب ساعتين و أنا نتعشا.. حتى كان كليت مليح.. نحط اللابتوب بش نقرا نقول نعمل طالا على فايسبوك الساعة. نحل نلقى 20 ألف ميساج. نجاوب عليهم تتحل هدرة. تجي ال11. نقول نورمال. نجم نعمل 4 سوايع قراية. باهين. نجوع مرة أخرى. نحط ناكل و أنا نتفرج في مسلسل. توفى الماكلة و المسلسل موفاش. لا لزمني نكملو. جات نص الليل و نص فديت من روحي فدة مزمرة. نكتب الستاتي هذا، نحط فيلم لين يهزني النوم! و ننوي اني غدوة صباح نقوم بكري و نحط نقرا. إيه نفهم فيك ا ندى.

يوميات طالبة ماجستير

نكتة فيمينستية غير منصوح بها لأصحاب القلوب السنفورية- نص مكتوب باللهجة التونسية

ولدي : ماما علاش أختي تخرج و أنا نقعد فالدار؟؟
أنا : خاطر هي طفلة و انتي طفل. كيف تاخو مرا تو تخرجك قد ماتحب
***
زوجي: حبي غدوة عندي طهور ولد صاحبي. أمان نحب نمشي. تعتني الكرهبة؟
أنا: أي تاخو يا عينيا.. أما كيف تروح تعمللنا عشاء قمقوم كيفك. باهي؟
زوجي: إيه باهي عيشك عيشك
أنا: أية اجا بوس حبي.. اجا عاد متحشمش

من باب الإنتقام و برة 

يوميات طالبة العلم متع الله (1) - نص مكتوب باللهجة التونسية

المهمة: نكمل نقرا أخر 100 صفحة من كتاب على صورة الإسلام و المسلمين في الصحافة البريطانية 
المهلة: لازمني نكملو الليلة 
الفايسبوك: هاهاهاها
السكايب: هاهاهاهاهاها 
أصحابي: هاهاهاهاهاها
دارنا: هاهاهاهاهاها
الجيران: هاهاهاهاها
الكتاب ذات نفسو: هاهاهاهاهاها

اساتذة، مشايخ و سياسيين آخر الزمان- نص مكتوب باللهجة التونسية

نستغرب من أشباه الأساتذة إلي كيف تشوف أخطاء الطلبة و إلا التلاميذ متاعهم ما تتدخل كان بش تمقسهم و تردهم ضحكة في الشبكات الإجتماعية و تلم أكثر جامات و برطاجات و قهقهات... و عمرهم ما يشوفوا حلول جذرية للمستوى التعليمي السنفوري المتعب إلخ إلخ.. و إلا أشباه المشايخ إلي نهار و طولو شادين الفايسبوك يطلقوا في الفتاوي على كيفهم باش يعملوا قاعدة شعبية مكونة من الميزوجين و أشباه المثقفين و المتأسلمين. منغير منحكي على السياسيين. هاو الناس لكل ولات تفهم فيهم سافا، حتى مولات الحمام إلي بجنبنا ولات تعبر تبارك الله. يرحمك يا ميخائل نعيمة. و الله لافاهم لحكاية الكل كان إنتي.

الفرحة هي... نص مكتوب باللهجة التونسية

الفرحة هي... 

انك تقوم من النوم وشعرك مشعشط و عينيك بالنوم و تغزر لروحك في المرايا و تحس روحك سكسي و مزيان و ميهمكش الغير كفاه يراك. انك تغزر لروحك في المرايا و تتبسم لروحك و تقولها بكل صدق نحبك. إنو يكون عندك ثقة في روحك وتخرج تشري فطور صباح و إنت هكاكة و تقول في نفسك "أنا في أسوأ حالاتي أزين منكم يا عفش". انك كيف تبدا فادد و مغينا عليك تحط الغناء على طولو و تفز وحدك تشطح كيف المهبولة. انك كيف تبدا تخمم برشة في الماضي و المستقبل تعرف انك كيف تمد قصة وتبدى تقرا بش تنسى مشاكلك و تولي تواسي في شخصيات القصة و تقلهم ميسالش اصبروا، 100 صفحة أخرى و توفى مشاكلكم.. انك كيف تعرف روحك تعبت و معادش بيك وين كيف تحط راسك على المخدة و تقرا قرأن بش تحس روحك أحسن و بش تنسى كل شي. انك كيف تقوم من النوم تحط موسيقى و تعمل شوية يوغا و تحكي و تتواصل مع روحك تعرف إنو المهم و الأهم هو إنت و حتى حد غيرك إنت. انك تعرف روحك إنت تشنوا و ميهمكش كلام العباد. إنو على قد متزيد تكبر تعرف إنو الدنيا بش تزيد تصعاب أما تعرف زادة إنو قلبك بش يزيد يكسح. انك مهما الدنيا و الناس بعدوك على أهدافك و أحلامك تعرف انك في الأخير بش توصل بش توصل. هكي هي الفرحة الحقيقة..

الأعراس في تونس.. ياسر كلاس يا بصاص- نص مكتوب باللهجة التونسية

كيلو مكياج و حومير مادونا و حواجب مرسومين و شوافر مركبين و حكاية كحلة تبدا لاصقة في اليدين و ظوافر طولهم زوز مترو راكبين و كل ربع ساعة تبدل روبة و كل روبة توزن ترناطة و تتصدر و الناس تبدا تتفرج فيك و تحكك أجنابك على طرح الجندابي و تهبط تشطح تقول تعمل في حصة رفع أثقال و أمك تبدا تقحرلك تقلك أرجع ترس أقعد أرزن تو يقولوا لعروسة خفيفة و في الأخير تروح و يسقط القناع و ينكشف المستور و تفجع هاكل مغبون و يتلفتلك راجلك و يقلك نا وين سي عناء.. لايش يا كبدي هالعذاب لكل لايش

كلية الآداب.. كليات السنافر- نص مكتوب باللهجة التونسية

بش نقول حديث و نعرف برشة مش بش يعجبهم. ه الكليات متع الاداب كان يمشو يسكروهم خير. تقري جيل كامل اللغة الإنجليزية و تصرف عليه و في الأخير 3 سنين يعدي فيهم 6 سنين و ديمة محلق يضيع في الوقت و يفسكي و ينقل و مبعد يجي يعاركلك على الماجستير و يعمل إضراب و يدخل الأكتاف و يفك بلاصة غيرو إلي يستحقها و مبعد يكتبلك في الإمتحان "يو إيز". و مبعد يولي أستاذ. كفاه؟ ربك أعلم. و يبدا يقري في أجيال اخرين و يبدا يغتصب في اللغة و يفشخلها في جد أصلها لول و يطلع جيل مضعضع و كاره للغة الإنجليزية و يبدا يحس في روحو يقرا في الصينية إلي هي أصلاً لغة كيف اللغات الكل تعطيها وقتها تو تتعلمها. لا علينا. قولولي شنية الفايدة إلي دخلناها للبلاد من اللغة و الأدب و الحضارة الإنجلزية و الأمريكية و و و ... زايد المخ مسكر و مفمة حتى إرتقاء في التفكير و حتى إلي تعلموا حاجة راهم ماتعلمو كان القشور من التهرديس إلى الأفلام المبتذلة و أسامي المغنين المتعبين. بالحق! كان يسكروهم خير. الإنسان مش محتاج كلية بش تقريه على الحضارات و الأداب. الحاجات هذوكم تتعلمهم وحدك. قداش من طالب اداب عمرو مشد كتاب في ايدو. و قادش من طالب في العلوم ياكل في الكتب ماكلة في برشة لغات و ميفلت شي. كان ج شعبة الأداب فيها خير راهي الحكومة توفر منح في الخارج لطلبة اللغات، رهو عندها قيمة و قدر كيف تجي تعمر هكل الورقة متع إختيار الشعبة في السنة الثانية ثانوي و متبداش حاشم، راهي مش إلي يلقى روحو ما عندو حتى غرام بحتى شي يمشي يحط اداب، رو استاذتي متع الفرنسية ماتقولش "يا ندى كان تمشي إنت و صاحبتك اداب راكم تعملوا ثورة في شعبة الأداب." اش ربحنا منهم ه الكليات احنا؟ مربحنا منهم شي. الحكومة ربحت أيه. هانو لهيو الناس لكل في القراية لا يطالبونا بخدمة لا منح لا والو. هانو كل جيل نعديولهم ملول 3 سنين جيش. إلي يعدي 4 و إلي يعدي 6 و فما حتى إلي يعدي أكثر. عادي عادي. كان يمشيو يسكروهم و يخليو كان المدارس التحضيرية و دار المعلمين العليا إلي أصلاً أمورها تضعضعت زادة و يحلو في بلاصت الكليات مراكز تكوين مهني و مراكز تكوين في اللغات حسب الإختصاصات من الطب و الهندسة و الشركات... لأنو اللغة ما نجمو نستعملوها بالحق و ما تنجم تفيد كان كيف تبدا في المجلات هذيكا. البلاد لاك بش تنهض بها بالحديث عن الحضارة الأمريكية و لا الروايات و القصص. توا تذكرت أول حصة حضرتها في الماجستير في بورقيبة سكول حي الخضرة. الأستاذ (نحبو و نقدر برشة، مفماش كيفو) دخل علينا بالإحباط. "انتوما الدولة تضيع في فلوسها عليكم. نتومة كيف تطلعوا اساتذة لغات نهار أخر كيفاش بش تفيدو البلاد. إلخ" و أنا وقتها نافحا و نقلوا لا يا أستاذ احنا نهار أخر باش نقريو أجيال و باش و باش. طلع أستاذي مازالوا عامين و يتقاعد. ديمة نحسو فادد و حزين. أما في الأخير طلع على حق. يمكن بعد درا قداه من عام تعليم حس إنو مقدم شي لبلادو و يمكن زادة يشوف فينا عباد ماناش باش نقدمو شي لبلدنا. يشوف فينا عباد كيف نوصلو لعمرو باش نحسو كيفو. كان ماشي فيبالي يحبط فينا باش يصفنا وإلي باش يكركر يخرج ملول. أما توا فهمت إنو كان 100% صادق معنا. هذاك علاه مانيش باش نكتفي بشهادة نعمل علاها إضراب و نسمي روحي معطلة عن العمل و نخلي القدر متاعي يتحكم فيه خدمة و شهرية تحت الحاكم. الشهادة في تونس ما تعنيلي شي غير اني نثبت روحي في هالمجتمع و نرضي و نفرح الوالد و الوالدة. وقتاش باش نفهموا إنو لازم تعمل برشة دورات تكوينية معترف بها في برشة مجالات باش تثبت و تفرض روحك. إنو معرفتك بلغة وحدة مش كافية. إنو الشهادة مش معناها خدمة. إنو لازم تنسى انك تلقى خدمة تحت الحاكم و تبدا تبني مستقبلك بيدك. يزيونا أمان. فيقو.