فما قراية؟ مفماش. فما ماجستير؟ مفماش. فما خدمة؟ مفماش. تي تونس جمايلية أصل!

Photo courtesy to: Les ISLT iens***طلبة المعهد العالي للغات بتونس

معهد ثانوي في أحواز القيروان، الإدارة لقات إنو عندهم سوايع مش لاقينلهم أستاذ. المنطق اش يقول؟ يعينوا أستاذ من المتخرجين البطالة إلي عندهم سنين و هوما يقرقو و جبهيو ماشين جايين على الوزارة و lلإدارة الجهوية و حتى المدارس الخاصة فماش متتحل في وجوهم ويلقاو وين يقريو. لكن لا. احنا في تونس أرقى من إنا نمشيو بالمنطق. اش تقرر المفقدة و اش تعمل الإدارة؟ تجيب أستاذ معوض يقري 6 سوايع كهو. و بقية السوايع يوزعوها على الاساذ الموجودين و الله أعلم يخلصوهم على السوايع الزايدة و إلا لا. شفتو المنطق عنا بصفة عامة محلاه؟ فاش قام نعينو أستاذ بطال ونحلوا المشكلة une fois pour toute؟ 

نسبة البطالة في تونس في عام 2013 وصلت ل-16.5%. و الحكومة فرحانة برشة قتلك تراجعت بنسبة 0.2% مقارنةً بالسنة الماضية. زغرتو يا نساوين. راو في ظرف 80 سنة باش ناقضيو على البطالة جملة وحدة. لمكنتي بش نبدو فاضحين بعضانا، شفتوهم هاك ال-50 ألف طالب إلي يتخرج كل عام؟ هوما يتخرجوا منا باش يلقاو خدمة تستنى فيهم. و نزيدكم زيادة باش يلقاو أكثر من خدمة تستنى فيهم وهما يختاروا على كيفهم. مش على خاطر ما كانش فما مواطن شغل وتوا فما. لا لا. على خاطر التعليم في تونس باش يقوى خاصةً مع هجرة الأساتذة المؤطرين.

و نسيتو نظام أمد؟ كان مجاش هو راو حالنا يندرا كيفاه. تي من القوة متع النظام هذا، الطلبة ذاقوا ال-"أ" ولاو يعتصموا و يعاركو على ال-"م". الناس ولات تقرق باش تقرا يا بو Gلب. علاش نهربو لبعيد احنا؟ هاو ناخذو كمثال، المعهد العالي للغات بتونس و المعروف ببورقيبة سكول، من أقوى معاهد اللغات في تونس. أما وليد عمي "المعهد العالي و المربط الخالي". كل ماجستير قبلو فيها لا يزيد عن 25 طالب. علاش؟ على خاطر معادش فما اساتذة باش تأطر و لا حتى باش تقري. تي فما اساتذة normalement ماخذة التقاعد عندها برشة وقعدوا يقريو و يأطروا على خاطر يعرفوا كان باش يخرجوا المعهد باش يبرك. هاذم بارك الله فيهم. و فما زادة إلي يحبوا يهاجروا و يقيرو في دول الخليج على خاطر يحب يبني دار أكبر و يشري كرهبة جديدة إلخ وميهموش مستقبل التعليم و مصلحة البلاد. ربي يهديهم أما عندهم حق بصراحة على خاطر حتى "البلاد" متهمهاش مصالحهم. الواحد ميلي يبدا يقرا لين يولي يخدم وحتى بعد ميتقاعد و هو حاير على مستقبلو.

خلي عاد من طلبة الماجستر سنة ثانية إلي حتى موقع الترسيم عن بعد مازال متحلش. تمشي للإدارة تقولك الوزارة. تجي تخمم على الوزارة علاه لتوى لحلتو مخك يفشل. العيد جا و الواحد لتوى لابدا يقرا. غمض عينيك وحلهم تلقى روحك في الإمتحانات.  تي c'est très normal مالا كيف نحتلو لمرتبة 104 من 160 دولة في تقرير الأمم المتحدة حول مؤشرات السعادة متع سنة 2013. قلك "Tunisian people are the most concerned with unhappinees." هذا لكل و تحبونا "هابي" تي الحالة متعبة أصل. 

Check out my opinion article about the Tunisian educational system on The Tunis Times: http://www.thetunistimes.com/2013/06/the-collapse-of-tunisias-educational-system-43671/