السفر عبر الزمن (تنبير تونسي)

كيف تسافر من تونس لبلدان الغرب الكافر تحس روحك سافرت عبر الزمن و إلا بين أكوان متوازية، مش سافرت من مكان إلى مكان. عمري ماخرجت من تونس أما هكى نتخيلها الحكاية. عقليات مختلفة و تفكير متطور. حاجة بديهية أثبتوهالي اصدقائي إلي عاشوا تجربة مغادرة أرض الوطن إضافةً إلى إحتكاكي ببعض الأجانب. منغير منزيد نحكي لنولي لحاسة الغرب و الكفر و الفسق و الماسونية. أما زادة بش منظلموش الناس، حتى كيف تمشي لدولة من الدول الجربوعستانية يوفرولك آلة زمن سمحة و يعودون بك إلى أيام الجاهلية. و مش لزمة عليك تسافر من بلاد إلي بلاد بش تسافر عبر الزمن. تنجم حتى و إنت في بلادك و تتعدى من عام إلى عام توخر بالأعوام بتوالي. تبدا في بالك تمشي من 2013 ال-2014 و تحضر في روحك ال-2015 و تلقى بعض الناس من إلي عايش في وسطهم يمشيو من 2014 ل-1994 و ينزل كاتريام و يضربها لل-1500 مثلاً. عادي عادي. دونك السفر عبر الزمن مش فكرة مستحيلة في نهاية الأمر. خلي عاد كان سافرت في خيالك. هذي قلتلهم اسكتوا. تخرج من فكرت إنو الكون رباعي الأبعاد أصل. تمييعاً لقضية نسبية المكان و الزمان و برة. سامحني انشتاين.

التعليم في تونس

حسب رايكم، بالنسبة للأولياء، هل انو مزال فما فرق بين تربية الاولاد و تربية البنات؟

بربي كفاه تحبو يكون فما فرق في التربية بن الأولاد و البنات وقتلي الناس مازالت تمشي بالعقلية الذكورية متع "عيب، إحشم مايجيج، راك طفلة، أرزن، الناس اش يقولوا عليك، إلخ إلخ" و "راجل مهما يعمل يبقى راجل، مايتعيبش" .. وقتلي تسمع إنو المرا تحب تجيب طفل باش تسكت دار رجلها و مبعد تجيب طفلة تنقم عليها وتعمللها 20 ألف عقدة أبوية، وقتلي المرا مازالت يعايروها يقلولها "يا جيابت البنات"، وقتلي الأم تتلفت لصغارها البنات و تقلهم خوكم صغير هذا سيدكم، وقتلي مازالوا الصغار إلي يقراو في المدرسة كيف يحبو يعايروا زميلهم يقولولو "يا بنية"، وقتلي الخو يتكبر على خواتو البنات حتى لو كانوا أكبر منو و يتحكملهم في حياتهم و الوالدين يغزرو و ساكتين.. ماشي في بالكم ولات تربيتهم كيفكيف على خاطر فما بعض البنات فهموا الحرية بالغالط؟ تحب تعرف تربيتهم كيف كيف و إلى لا، حط طفلة وطفل و قولهم زوز يمشو يقولوا لوالديهم "بابا، ماما، راني نحب شكون. بابا، ماما، راني نحب نسافر نكمل تعليمي برى. بابا، ماما، راني نحب ندبر خدمة مش في البلاد هاذي. بابا، ماما، معادش نجم نمشي ونجي من بلد لبلاد كل نهار لازمني نكري." شوف ردت الفعل و قارن و اتو تعرف ترباو كيفكيف و إلا لا. قاعدين تحكموا وتقولوا إنا ولينا كيفكيف فقط من خلال بعض البنات إلي فاكين الحرية فكان. أنا خويا يخرج وقت مايحب و يروح وقت مايحب و يمشي يصيف مع الأصحاب و مخولينو على راحتو مش على خاطر عندهم ثقة فيه لكن على خاطروا رجل و المجتمع ميعايروش. و أنا نخرج مرة في القرن و كيف نجي نخرج لازم نكذب شوية برغم إني محل ثقة و ماعندي علاش نكذب. مثلاً أنا عندي 3 اسابيع مخرجتش و توا خارجة نحوس مع 3 بنات اخرين مفماش أولاد و خارجين بعد العصر و مروحين قبل المغرب و كاذبة على دارنا قتلهم هدف الخرجة باش نحكيو على خدمة تابعة جمعية. قولي توا؟ متربين كيفكيف؟ نشوف صغار خواتي مانراش فرق كبير. نشوف صغار اخرين في الحومة في الروضة في الشارع مانراش فرق بيني وبينهم كيفاه أنا و خويا تربينا وكيفاه هما وخواتهم ترباو.. كيفاه تحب يكون فما فرق و العقلية هي هي. كيفاه تحب يكون فما فرق و مفماش توعية. الصغار إلي ترباو على ما يسمى ب"أدوار الجنسين" إلي أساساً يمليها المجتمع إلي أصلاً مازال لحد يومنا هذا ذكوري، أكيد باش يمارسوها على صغارهم و مش باش يكون فما حتى فرق.

بشر فقدوا انسانيتهم

طفلة في عمر الورد، روحها طارت و خلات بدن ممدود، ميتحركش، ميتكلمش، ميضحكش، بدنها تردم تحت الأرض 

وروحها تدفنت في السماء تلعب بين النجوم و كيف تتعب تشوف وجها على القمرة متخبية.. شوات قليب ميمتها و بوها و خواتها إلي حبوها و كوزيناتها إلي دليلوها و رفاق الدراسة و السياسة إلي صاحبوها. عندها مدة ميلي فارقتنا أما كلامات الناس لتوى لفارقتها. "تستاهل! اش مطلعها على موتور مع واحد كلوشار مهبول!" ركبت على موتور حبت تطير تتنفس تتفرهد دونك تستاهل الموت؟ انها ركبت على موتور يعني ارتكبت جريمة في حق شرفها و سمعتها دونك تستاهل الموت؟ طفلة في عمر الوردة. قراية. ناشطة. حية. في روحها عندها ماتقول. تقرا في النموذجي. السنة باك. شوفو إلي عقولهم نظيفة اش يشوفوا و نتوما بعنيكم المريضة اش تشوفو. هما يشوفوا طفلة كانت تنجح من الأوائل في الباك و تشرف إلي يحبوها بمخها و نجاحها و افكارها. يشوفوا طفلة كانت تطلع طبيبة و إلا مهندسة و إلا استاذة جامعية. يشوفوا طفلة تخليلكم جربوعستانكم واسعة و عريضه و تكمل قرايتها البرة و تزيد للعلم دراسة و إلا ثنين... قالوا كفاه تركب مع طفل موشم فقط بش يطلعوها جانيا و تصاحب في أصحاب السوء مش نيتهم يحكيو على الطفل بالخايب. طفل يرحمو ماهو إلا طفل. راجل مايتعايبش مهما يعمل أما هي أنثى تتعايب حتى كيف شي ماتعمل. هذا إلي يقولو دينكم؟ "اذكروا موتاكم بخير"؟ صحيتكم يا مؤمنين يا مسلمين يا مسالمين، يلي حتى موتاكم منكم مش سالمين.. صحيتكم يا طاهرين يا شرفة يلي مخاخكم نظيفة يلي قلوبكم طاهرة وعفيفة. صحيتكم يلي عمركم مرتكبتو لا خطأ ولا خطيئة يلي بش تمشيو للجنة! على الدزة هذي كان الجنة معبية بأمثالكم السماح فيها. مع العلم إنو كان فما خطأ عملتو الطفلة راو انها ملبستش خوذة ومنتبهوش في الطريق بما فيه الكفاية.

صلبوها. رجموها بكلماتهم الغادرة. فارقت روحها هذه الحياة لأنها أطهر من أن تعيش وسط بشر فقدوا انسانيتهم و استهلكتهم عبودية العقل وإنحطاط الفكر والأخلاق.