في تونس: اليوم تعدد الزوجات.. غدوة زواج القاصرات.

ليوم تونس كيف العادة قاعدة تمر بحكاية تافهة أخرى. حكاية انتجوها ناس تافهين و كبروها ناس أتفه منهم. الحكاية هذي اسمها "تعدد الزوجات". قلك السيد عادل العلمي، سود الله وجهه، يلزمنا نطبقو شرع الله. كيفاه يحب يطبقوا؟ إنو كل راجل يولي عندو الحق يعرس ب-4 نساء. وبعض السفهاء و تجار الدين إلي كيفو قلك أيه هيا نسمعوا كلام ربي. المصيبة مش انهم يحبوا على تعدد الزوجات. المصيبة انهم عاملين رواحهم يحبوا يطبقوا شرع الله وقتلي هوما في الحقيقة يحبوا يستعملو الدين باش يشبعو شهواتهم و رغباتهم. "عباد" (بش منقولش رجال) تلقاهم بطالة و تشرب و تزطل وتزنى جاهلين بالدين لا مستوى لا ثقافة و كيف سمعت على تعدد الزوجات ولاو في قمة الدين و يقولو هاو الرسول عليه الصلاة والسلام تزوج بأكثر من مرا. معناها هكا نيتك إنتي؟ تقارن في روحك بالرسول؟ تي الرسول عليه الصلاة و السلام منجمش يعدل بناتهم وكانت السيدة عائشة عليها السلام أحب زوجاته إلى قلبه. معليناش في هذا لكل. معناها احنا صارت في بلادنا ثورة باش ها المرضى عقلياً و المكبوتين جنسياً ياخذوا 4 نساء؟ معناها احنا مشاكلنا زواج و إشباع رغبات؟وخالي عاد من %0.000000000000000000000000000001 نساء هاكلي ماشين هازين شعارات و يطالبوا بتعدد الزوجات. تي كان جيتو عاهرات في جسدكم أشرفلكم من العهر الفكري إلي تمرسوا فيه! و الأفظع هو إنو ها "العباد" قاعدة تتهم في الناس إلي ضد تعدد الزوجات ب إنهم "اغايرن و برة و ميحبوش يشاركو رجالهم مع حتى حد." خسئتم! تي احنا قاعدين نحميو في أنفسنا و فيكم شخصياً و في مجتمعنا عربياً كان أم أمازيغياً من الوطأة متاعكم إلي تمارسو فيها كل مرة يتجبد فيها ملف "تعدد الزوجات". محسوب هالي يحبوا على 4 نساء ماشي في بالكم يحبوا يسترو نساء و يكونوا عيلة و يستقرو؟ هاكم يحبوا على وثيقة عقد نكاح لا أكثر لا أقل. يا كهو عاد. اليوم تعدد الزوجات. غدوة تقلي نحلول تزاوج القاصرات قال شنوا الرسول عليه الصلاة و السلام تزوج السيدة عائشة عليها السلام و عمرها 6 سنين و دخل عليها عمرها 9 سنين. إلي هي حكاية اخراجها البخاري إلي الأحاديث متاعو يتبعوا فيها و يزيفوا فيها الوهابيين تجار الدين متع السعودية إلي يحرفوا في دين الإسلام و يستعملو فيه كحجة باش يبررو بها أفعالهم الدنيئة قدام العباد و نساو رب العباد كيف بش يسألهم نهار اخر على أفعالهم و تحريفهم للإسلام. حسيلو ملخر مضمضو و امسحو شواربكم .مليح. حراير تونس مستحيل يخليوكم تردولنا بلادنا . دولة من دول الخليج الوهابية.