اسمها عيشة و هي ماهيش عيشة.. ميلي تولدت جاوها قالولها هاو كيفاه بش تعيش يا عيشة.. هو اش بش يصيرلك يا عيشة.. برمجولها كل شي.. اقرا.. أدخل للكوجينة تعلم طيب.. تعلم كفاه تسيق دار وتمسح غبرة.. علاه؟ على خاطرك تولدت أنثى.. مفهمتش؟ باهي على خاطر بش تعاون أمك. باهي نعاون أمي أما شبيه خويا ميعونش أمي؟ على خاطروا ذكر.. على خاطر ميلي تولد و أمها تقلها هذاكا سيدك. علاش سيدي؟ على خاطروا ذكر..
يا عيشة رد بالك تحب.. الحب حرام. الحب عيب.. الحب مايجيش.. اش يقولو علينا لعباد.. بنتها حبت.. بنتها تحب تاخو واحد تحبوا و يحبها... مناخذولك كان إلي احنا نحبو و نرضاو عليه.. لا متخوش هذا.. أي عرس بهذا.. منحبوش.. تو تحبو متخافش.. منحبش نعرس.. نحب نحب.. نحب نكمل قرايتي.. نحب نسافر.. نحب نولي حاجة كبيرة.. نحب نولي انسان.. نحب نحس بروحي إلي أنا انسان.. شنية؟ فش تحكي هذي؟ كول طريحة يا عيشة.. إنت أنثى متعرش مصلحتك.. وقيت بش تعرس.. شبيك بطيت؟ شبيك لتوة لاجبت صغار؟ متحبش تجيب منو صغار؟ وكلها طريحة.. اغتصبها.. شنية؟ مدام راجلها ميتسماش اغتصبها. عيشة سكتت و جابت صغير أما عمرها محست بالأمومة... بطلوها من قرايتها سكتت.. عرسولها بسيف سكتت.. اغتصبها سكتت.. جابت صغير سكتت.. سكتت! سكتت! سكتت! و فلخر؟ فلخر عيشة ولات كيفهم.. تعبت ولات كيفهم.. سلمت ولات كيفهم.. و إلي صار عليها عملتو في بنتها.. و توا وفا عمرك.. موت يا عيشة.. موت! موت! نموت؟ علاش وقتاه عشت أنا بش نموت؟
توا هذي عيشة؟ و الله لاهي عيشة.. و الله لاهي عيشة..
قريتو و أنا قاعدة و مرتاحة.. لكن النسق تقوّى، الجمل قصار .. سؤال ورى سؤال بسرعة برقية، دهشت و أنا نقرى و بديت نسمع في نبضات قلبي .. دليل إنو هل الحكاية و طريقة طرحها بالخصوص، أثرت فيّا و حركت ما بداخلي من غضب و إشمئزاز من تخلف ما يسمى بالمجتمع الذكوري.. *** موفقة ندى
ReplyDeleteشكراً أماني :)
ReplyDelete