ميلي أنا صغيرة ديمة كيف نسمع حد يتمنيك على حد اخر يقولو "يا عربي يا Gعلاف"، "تي هذاك واحد عربي مGعلل"، ولا خالي عاد من هاكل الكلمة إلي عاطية على اللغة الإنجليزية "عريبيتش". مفهمتش وقتها. يخي مش لكلنا عرب؟ كيفاه عربي يتمنيك على عربي يقولو يا عربي؟ كيف كبرت و سألت قالولي راو كيف الناس تقول "يا عربي" راو يقصدوا إلي جايين من الأرياف و من الجنوب و إلي يحكيو بال-"G" بصفة عامة.
نتذكر قبل في وقت بن علي، يبداش واحد هبط من طيارة ويفرق في الفلوس و كاتب 20 ألف كتاب أما يحكي بال "G"؟ يبقى محGور. ويقلولو "يا عربي". أما توا؟ الحGرة هي هي أما juste مخبية.
و من بعد نتذكر كيفاه الأمازيغ في تونس يقول إنو تونس أصلها أمازيغية و إنو بورقيبة يرحمو دفنهم بالحيا وقال التوانسة عرب و تونس عربية. ياخي قلت زعمة مش الأمازيغ كانوا يتمنكوا على عرب تونس وكل ما واحد يعمل حاجة مش من عادات الأمازيغ يتمنكوا عليه يقولولو "يا عربي". و مبعد قعد التعبير متداول بن لعرب ولا عندو bad connotation.
هنا هكاكة ونتذكر وقت الإستعمار كيف كانوا الفرنسيس داخلين خارجين على تونس وكيف كانوا يجيو يعيشوا فيها ويعملونا خدام عندهم. زعمة مش هوما طلعوها التمنيكة و عداو ال-passe لقوادة فرنسا ولاو يقولو فيها لغيرهم و مبعد ولات تتقال على إلي يسكنوا في الأرياف و الأحواز.
المهم، عرب و إلا أمازيغ، ديمة التوانسة تحسنا أعداء بعضنا. جماعة المدينة يتمنيكوا على جماعة الريف باش يحسوا رواحهم class و فوق روسهم ريشة. و جماعة الريف يتمنيكوا على جماعة المدينة و يقولو انهم تخلاو على أصلهم و عاداتهم. و تلقى زادة جماعة الريف ميحبوش ولادهم ياخذوا مرا من المدينة. و جماعة المدينة ميحبوش يعطيو بناتهم لواحد من الريف. و هذي حاجة موجودة في مجتمعنا لتوا حتى بعد الثورة. على خاطر الثورة اطاحت ببن علي ومأطاحتش بالعقول المتأخرة و الأفكار المتخلفة. لكن كيف ماقال محمود درويش "بى أملٌ يأتى ويذهب ، لكن لن أُوَدعه". عندي أمل إنو الأجيال هذي و إلي انا منهم و الأجيال القادمة زادة باش ينحيوها العقلية هذي. علاش؟ على خاطر متأكدة إنو برشة منا حبوا و تحرموا من انهم يكونو مع الناس إلي تحبهم على خاطر أسباب تافهة كيف "هذا ولد مدينة" و "هذي بنت الريف". و منحكيوش عاد على "بنتي مزيانة و ما نعطيها كان لواحد لاباس عليه" و "ولدي بشهريتو مانعطيه كان لبنت فلان و فلانة". ولات أقدار الناس بيعة وشرية و خوذ و أعطي و ملخر لعبة بن ادين الوالدين. العربي لا تهمو مشاعر ولا حب. مايهمو كان ثلاثة حاجات: الجيب، الزين، من المدينة ولا من الريف.
No comments:
Post a Comment