يحبوني عادية. ناكل عادي. نشرب عادي. نرقد عادي. نقرا عادي. نفكر عادي. نحس عادي. نكتب عادي. و إلا تعرف كفاه؟ مش لزمة تكتب. مش لزمة عليك تكون نفسك. كون النفس إلي يحبو عليها العباد. خبي! إكذب. نافق. اخدم خدمة عادية. خوذ راجل عادي. أعمل دار عادية. جيب صغار عاديين. صاحب عباد "بريئين" عاديين. تصرف كيف ماهوما يحبو. أحكي بالطريقة إلي هما يحبو عليها. كون بكما. كون متعرف شي. و إلا أعمل روحك متعرف شي. كون "بريئة". و إلا تبهلل و أعمل روحك "بريئة". كون عادية. ماهياش صعيبة الحكاية. خلي هما يرضاو عليك. مش لزمة نفسك ترضى عليك. طز فيها نفسك. أما نفس و أما تخذريط؟ فش تحكي؟ كون عادية. و كيف نقول عادية معناها كيفهم. كون كيفهم مكانش تولي معادش "بريئة"، معادش عادية، معادش يرضاو عليك، معادش يقبلوك، معادش باهية. تتبدل بش ترقد على الجنب إلي يريحك تولي إنسان سيئ في نظرهم. تمر بفترة قاعد تحاول تفهم فيها نفسك يرفضوك و يثوروا عليك. تخرج شوية عن المألوف تولي ماكش عادية. إيه. أنا خترت اني نكون مانيش عادية. و نعيش عيشة ماهياش عادية. اخترت راحتي على راحة غيري. اخترت نكون على طبيعتي. الطبيعة إلي الواحد تخلق عليها. الواحد تخلق بش يكون إنسان فريد من نوعو، مختلف، مش مقلد لناس اخرين، مش يقلد الناس لوخرين في تصرفاتهم و حديثهم و تفكيرهم بش يقبلوه في مجموعتهم. يا تكون كيفنا يا منفهموكش و منقبلوكش و نتهموك انك إنسان سيئ و غير "بريء". الإنسانية عدات عمرها لكل تقاسي في الإنسان. الإنسان عدا عمرو الكل في نرفضك وترفضني. نقصيك و تقصيني. متفهمنيش و منفهمكش. تهيني و نهينك. نقسمو بعضنا إلا مجموعات و نعاديو بعضنا على خاطر مختلفين. نقسمو بعضنا حسب الدين، العرق، الجنس، الانتمائات السياسية، الميولات الجنسية، هذاكة جاي من المدينة و لاخر جاي من الريف، هذاكة يسمع روك و لاخر يسمع اناشيد صوفية، هذاكة ذكي ياسر يقرا طب و لاخر ما لقى مايقرا مشى اداب، هذاكة يقرا برشة كتب ماشي فيبالو بش يصنع صاروخ و لاخر يعدي وقتو ينبر على العباد في القهاوي، هذاكة زنديق كافر ديمة يسأل اسئلة على ربي و لاخر مطفيه ربي و ماعندو حتى علاقة بيه ميسالش لمهم مايسألش، هذيكة ملهوفة على العرس بش تموت على راجل و لخرة تحب تعرف الحب إلي يحكيو عليه في الكتب. فك عليك و كون عادية. و إذا مكش عادية، نافق و إكذب و مثل. بش يقبلوك لعباد. المهم العباد. مش لزمة تكون راضية على روحك. طز في روحك.
No comments:
Post a Comment