طفلة يعنفها خوها إلى حد الموت ويخليها مطيشة لين يلقاوها بعد 3 أيام. لهنا نتذكر المحاضرات والنقاشات إلي حضرتهم يحكيو على القانون التونسي وكفاه المرا لازمها تمشي تشكي بالمعنف متاعها وشنية الإجراءات القانونية والخطوات النفسية إلي لازمها تبعهم. بعد مانسمع خبر كيف هكى نجم نقول كان حاجة بركة. تنجم تبني سد متع خراء الثور وتشد الفيمينيزم متاعك وتسد بيه السد هذاكة لين يولي معادش فما عنف ضد المرأة. صدقني المنهجية هذي تصلح أكثر من الطاولة المستديرة والفلوس إلي تصرفوا فيها على كعبتين والكعبة إلي يحضروا في كل نشاط تعملوه. أخطاونا من الفيمينيزم الكلاسيكي المبتذل متع 100 سنة التالي. الأنركية هي الحل. أعمللهم رقم أخضر يطلبوه كل ما طفل يعنف وحدة ولا خو يعنف أختو نظراً لفقدان عضوه الذكري لما يسمى بالإنسانية (وليس الرجولة) ويبعثولها زوز يدقوه بطراحة فماش مايتربى مدام والديه مرباهوش على الإحترام والقيم الإنسانية وخلاووه عمرو الكل يبحث عن الرجولة المفقودة. مش واحد نهار وطولو يضرب أختو ويسمع في امو في الكلام الزايد تقولو "خويا اجا هاو فلاير يحكي على حقوق المرأة ومكانتها في المجتمع" وهو يجاوبك يقلك "يا! والله لا في بالي! هاو بعد هل الطاولة المستديرة هذي معادش باش نضرب أختي ونولي نحبها وكذا. سينون أختي فما بوز كافي؟"
No comments:
Post a Comment