صديق1: هيا مترو جا
أنا: استنى نقص
صديق1: هيا بارك، رسكي!
أنا: لا منجمش!!
[يفوتني المترو ونبقى نستنى في المترو الجاي وحدي ساعة كاملة ]
---
صديق2: عمرك ما رسكيت في حياتك؟
أنا: عمري ما رسكيت.. نجمش نرسكي.. نحس روحي نسرق
صديق2: في شكون تسرق؟
أنا: في الدولة، في الشعب..
صديق2: لا هاذي أخلاقيات وهمية. تطبيقها مهوش باش يزيدك شي. ومهوش بش يزيد الوطن في شيء.
أنا: شنوا الفرق بين واحد يسرق مليارات واحد يسرق حق ركوب؟ الفعل هو هو. يعني إلي سرق حق الركوب في المترو كيف تجيه فرصة باش يسرق مليارات ماهوش باش يتردد وإلي عندو أخلاقيات وهمية كيف ما إنت تسمي فيهم كان تلوحلوش المليارات قدامو وتقلو حد ماهو باش يحاسبك كان تهزهم ميهزهمش.. شفت صديقي؟ الوطن ماهياش شعارات رنانة نقولوها في إجتمعات ومظاهرات نقابية. الوطن هو انك تدفع حق المواصلات إلي تستعمل فيها. الوطن هو انك متلوحش الوسخ على القاعة. الوطن انك متدعداش على غيرك. الوطن هو انك تعاون غيرك من غير مقابل حتى لو كنت متعرفوش. الوطن هو انك تعطي وما تنتظر حتى شي في المقابل. الوطن موجود في الحاجات الصغيرة الوهمية هذيكا.
No comments:
Post a Comment