الوطن موجود (2)

نشوف في "رجال" تتبول في الشارع لا حشمة لا جعرة.. نشوف في زبلة ووسخ مطيش في كل بلاصة..

نشوف في أحياء أموات "يبراكيو" في عربات صفراء يقال انها توصلهم للأماكن إلي يحبو عليها بعد يوم طويل من الأشغال الشاقة في "الوطن".. تلقاهم واقفين في وسط الطريق ومش خايفين لاتعفسهم كرهبة ولا تدخل فيهم كار.. 

نشوف في روحي نبقى مطيشة بالساعتين خاطر منحبش ندز ونتعصر في باب الكار باش نفك كرسي ونروح.. 

نشوف في ناس تسكت على الحق. كيف تشوف طفلة تعرضت للتحرش ودافعت على روحها حتى حد ما ياقف معاها والناس الكل تغزرلها غزرة دونية وهيا ما اقترفت حتى ذنب.. 

نشوف في شخص يتسرق على مرأى من الجميع والجميع هاذم لكل يتفرجوا ساكتين خايفين.. 

نشوف في أصحابي كيف يمشو للحاكم باش يشكيو ولا يبلغوا على حاجة، يعملوا محضر ويعديوه لل cold case files وهو سخون. على خاطر الحاجة إلي يحبو يبلغوا عليها كيف تبدا سرقة في مترو ولا تحرش ولا حد يهرسل فيك نورمال.. يقولولك مدامك لباس أكهو.. احمد ربي.. 

كل نهار نخرج للشارع ويدي على قلبي وأنا ندرب في روحي ونقول بصوت خافت "ندى، متخافش منهم. كان يكلمك واحد إقحرلو. كان يلسقك واحد دزو بعيد. كان يحاول حد يسرقك اضربو. متجمدش. ماتخافش." ونبقى نقول في الجملة هذيكة كأنو قولها باش يحميني. 

بمختصر العبارة انها ال Dystopia متلحفة برداء وطني..